Fulltrúar neytenda: Fagna aðgerðum Samkeppniseftirlitsins

„Ég fagna því að Samkeppniseftirlitið beiti þeim heimildum sem það hefur til að stunda virkt eftirlit," sagði Gísli Tryggvason talsmaður neytenda, þegar Vísir hafði samband við hann vegna húsleitarinnar sem gerð var hjá Bónus og Krónunni í morgun. Hann tók þó fram að hann væri bara nýbúinn að frétta af málinu og gæti því lítið tjáð sig um það. "Mér finnst það standa upp úr í umræðunni síðustu daga að verðbreytingar á tilteknum vorum virðast vera allt of tíðar," segir Gísli.

Jóhannes Gunnarsson, formaður Neytendasamtakanna, tekur undir með Gísla. Hann segir aðgerðir Samkeppniseftirlitsins mjög eðlilegar í ljósi umræðunnar sem hafi verið undanfarna daga. „Samkeppniseftirlitið gerir ekki húsleit nema að fengnum dómsúrskurði frá héraðsdómi. Því hlýtur að vera rökstuddur grunur að baki þessari húsleit," segir Jóhannes. Hann segir þó of snemmt að spá fyrir um hvað húsleitin leiði af sér.