Viljum gjarnan hreinsa okkur af ásökunum um verðsamráð

„Við viljum gjarnan hreinsa okkur af þeim ásökunum sem hafa verið bornar á okkur," segir Finnur Árnason, forstjóri Haga, spurður um afstöðu sína til húsleitarinnar sem starfsmenn Samkeppniseftirlitsins gerðu hjá Bónus í morgun.

„Við erum sannfærðir um að rannsókn mun ekki leiða neitt óeðlilegt í ljós," bætir hann við. Að öðru leyti vísaði Finnur á fréttatilkynningu sem Bónus sendi frá sér í morgun en þar kemur meðal annars fram að Bónus fagni því að Samkeppniseftirlitið hafi hafið rannsókn á þeim alvarlegu ásökunum um verðsamráð sem hafa komið fram. Þetta sé í samræmi við þá ósk sem Hagar hf., rekstraraðili Bónuss, setti fram í bréfi til Samkeppniseftirlitsins dagsett hinn 1. nóvember síðastliðinn.

Guðmundur Marteinsson, framkvæmdastjóri Bónuss, sagði við fréttastofu nú á tólfta tímanum að einn maður frá Samkeppniseftirlitinu væri enn á skriftstofum fyrirtækisins við að afrita gögn úr tölvum. Aðrir starfsmenn eftirlitsins hefður haft á brott með sér hálfan pappakassa af gögnum.

Aðspurður hvaða skýringar forsvarsmenn Bónuss hefðu fengið á húsleitinni sagði Guðmundur að hún hefði komið í framhaldi af umræðum í fjölmiðlum undanfarnar vikur um meint samráð á matvörumarkaði. „Við höfum ekkert að fela og við óskuðum eftir því að eftirlitið rannsakaði málið til þess að hægt væri að hreinsa okkur af þessum ásökunum," sagði Guðmundur Marteinsson. Því hafi húsleitin í sjálfu sér ekki komið á óvart.

Ekki hefur náðst í forsvarsmenn Kaupáss vegna húsleitarinnar.