Orkuveitupeningarnir borga sérfræðikostnað

Ólafur Áki Ragnarsson, bæjarstóri í Sveitarfélaginu Ölfusi, segir af og frá að þær 45 milljónir sem Orkuveita Reykjavíkur greiðir sveitarfélaginu í tengslum við virkjun á Hellisheiði renni í vasa sveitarstjórnarmanna. Peningarnir greiðast á sex ára tímabili og er þeim ætlað að standa straum af sérfræðikostnaði sem fellur til við skipulagningu málsins.

 

„Það var gerður samningur við OR um ýmis málefni í apríl síðastliðinn," segir Ólafur Áki í samtali við Vísi Hann segir samninginn vera sambærilegan við samninga Landsvirkjunar við sveitarfélög á Austurlandi á sínum tíma. „Svona framkvæmdir kalla á meira álag og umsýslu fyrir nefndarfólk hér auk þess sem við þurfum að kaupa ráðgjöf frá ýmsum sérfræðingum. Við fáum til okkar sérfræðinga nær daglega, lögmenn, náttúrufræðinga og sérfræðinga í vatnsbúskap. Þessir peningar standa straum af þeim kostnaði," segir Ólafur Áki og bætir því við að peningarnir renni ekki í vasa sveitarstjórnarmanna.

Í frétt á heimasíðu sveitarfélagsins frá því í apríl í fyrra er sagt að til að mæta „auknum umsvifum á bæjarstjórn, bæjarstjóra og skrifstofu Sveitarfélagsins Ölfuss á meðan framkvæmdir við virkjanir á Hengilsvæðinu standa yfir, greiðir Orkuveita Reykjavíkur sveitarfélaginu kr. 45 milljónir á sex árum." Fréttablaðið greinir frá þessu á forsíðu í dag en ekki kemur fram hvert peningarnir fara.

Þá segir einnig í blaðinu að Orkuveitan lýsi Þrengslaveg fyrir sveitarfélagið. Ólafur segir rétt að OR muni sjá um framkvæmdina en að sveitarfélagið greiði fyrir hana samkvæmt samningi.

 

Þá segir einnig í fréttinni að OR hafi tekið að sér að reisa nýja fjárrétt og hesthús fyrir Ölfusinga. „Þeir tóku réttina í burtu þegar framkvæmdir hófust og því er ekki nema eðlilegt að þeir standi straum af kostnaðinum við að byggja nýja."