Ekki þörf á fleiri umboðsmönnum

Efla þarf embætti umboðsmanns Alþingis í stað þess að stofna til umboðsmanna fyrir einstaka hópa og mál. Þetta kom fram í máli Birgis Ármannssonar, formanns allsherjarnefndar, á Alþingi.

Allsherjarnefnd skilaði í morgun áliti um skýrslu umboðsmanns Alþingis. Í máli Birgis Ármannssonar, formanns allsherjarnefndar, kom fram að hann telur ekki nauðsynlegt að stofnað verði til umboðsmanna fyrir hina einstöku hópa. Þess í stað vill hann efla embætti umboðsmanns Alþingis svo hann geti sinnt fleiri verkefnum.

Vísaði Birgir meðal annars í orð fulltrúa fatlaðra og öryrkja sem vilja ekki sérstakan umboðsmann heldur efla umboðsmann Alþingis.