Fullkomið kvikmyndaver á Keflavíkurflugvelli

Í apríl á næsta ári er áætlað að tekið verði í gagnið risastórt kvikmyndaver á Keflavíkurflugvelli. Það eru þeir Hallur Helgason, Ingvar Þórðarson og Júlíus Kemp sem standa að verkefninu en erlendir aðilar koma einnig við sögu.

"Þetta verður aðstaða í hæsta gæðaflokki. Risa stórt rými, hljóðeinangrað, vítt til veggja, engar súlur og bara frábær aðstaða til kvikmyndagerðar þar sem menn koma inn með sín tæki og tól," segir Hallur en áætlað er að vera í mörgum húsum á Keflavíkurflugvelli. "Meðal annars er eitt gamalt flugskýli."

Að sögn Halls er kvikmyndaverið hugsað fyrir alþjóðlegan markað og hann leggur áherslu á að þeir séu ekki að fara í samkeppni við íslensk fyrirtæki heldur sé um að ræða viðbótarþjónustu við það sem hefur verið til. "Þetta ætti bara að styrkja þau fyrirtæki sem hafa verið að vinna með erlendum aðilum. Þetta hefur verið sá hluti sem menn hafa átt erfitt með að bjóða upp á hér á landi."

Þremenningarnir hafa fengið erlendan ráðgjafa til liðs við sig en hann vill ekki gefa upp hvaða erlendu aðilar séu með þeim í þessu. "Þetta er allt á frumstigi."

Strákarnir eru að kaupa mannvirki á Keflavíkurflugvelli og áætla að allt verði tilbúið í apríl á næsta ári. "Við ætlum að setja töluverða fjármuni í að breyta þessu svo allt verði fyrsta flokks," segir Hallur sem getur ekki skotið hvað kvikmyndaverið muni koma til með að kosta. "Þetta er dýrt," sagði Hallur að lokum.