Þriðjungur barna óánægður með útlit sitt

Þriðja hvert þrettán ára barn er óánægt með eigið útlit og fjórða hvert tíu ára barn hefur átt erfitt með svefn. Þetta kemur fram í nýrri rannsókn sem gerð var meðal skólabarna hér á landi.

Rannsóknin var unnin fyrir menntamálaráðuneytið af Rannsóknum og greiningu, sem er rannsóknarsetur við Háskólann í Reykjavík. Fyrr á þessu ári var spurningalisti lagður fyrir öll grunnskólabörn í 5., 6. og 7. bekk. Niðurstöður rannsóknarinnar sýna að 21% stráka og 23% stelpna í sjöunda bekk finnst þau vera of feit og 11% stelpna og stráka á sama aldri finnst þau of mjó. Álfgeir Logi Kristjánsson, aðjúkt við Háskólann í Reykjavík, segir niðurstöðurnar sýna allt að þriðjungur nemendanna er óánægður með útlit sitt. Þetta valdi áhyggjum og spurning sé hvort um sé að ræða afleiðingu skilaboða sem börnin fái frá samfélaginu.

Alls tóku hátt í ellefu þúsund börn þátt í rannsókninni sem er yfir 80% allra skólabarna á aldrinum 10-13 ára. Almennt sýna niðurstöðurnar að nemendunum líður vel en það vekur athygli að allt að því fjórðungur barnanna sagðist hafa átt í svefnerfiðleikum síðustu sjö dagana fyrir könnunina. Álfgeir segir erfitt að geta sér til af hverju þetta stafi en þetta sé eitthvað sem þurfi að rannsaka nánar.