Guðmundur Jónsson borinn til grafar

Einn ástsælasti söngvari þjóðarinnar, Guðmundur Jónsson, var borinn til grafar í dag. Guðmundur lést á elliheimilinu Droplaugastöðum aðfararnótt 5. nóvember síðastliðinn 87 ára að aldri. Guðmundur lauk verslunarprófi frá Verzlunarskóla Íslands árið 1937 og var við framhaldsnám í Wood´s College í Hull 1941. Guðmundur lærði söng hjá Pétri Á Jónssyni óperusöngvara og fór svo í framhaldsnám erlendis. Meðal annars lærði hann í Los Angeles, Stokkhólmi og Vínarborg. Hann var einn vinsælasti einsöngvari þjóðarinnar og kenndi um árabil við Söngskólann í Reykjavík, eftir því sem fram kemur í minningarorðum um Guðmund sem birtust í Morgunblaðinu.