Dagmamma undirbýr komu dæmds barnaníðings

"Atvinnuöryggi mínu er stefnt í hættu," segir dagmamma sem rekur daggæslu í sama húsi og barnaníðingurinn Sigurbjörn Sævar Grétarsson keypti nýlega íbúð.

Sigurbjörn keypti íbúðina, sem er í Vallarhverfinu í Hafnarfirði, í fyrra. Þá sat hann á Litla-Hrauni og afplánaði þriggja ára dóm fyrir kynferðisbrot gegn ungum börnum.

Hann lýkur afplánun um helgina og mun þá flytja í sama stigagang og fjöldi barna sækir dagvistun dag hvern.

Sigurbjörn sagði í Kastljósi Sjónvarpsins í gærkvöld að hann myndi ganga á fund nágranna sinna þegar hann lýkur afplánun og tilkynna þeim að hann hafi fengið dóm fyrir að brjóta gegn börnum.

Svo virðist sem nágrannarnir séu einu skrefi á undan Sigurbirni því nokkrir þeir hafa þegar undirbúið komu hans í húsið.

Dagmamman sem Vísir ræddi við sagðist hafa greint foreldrum þeirra barna sem hún gætir frá þeirri stöðu sem upp sé komin. Flestir þeirra hafi tekið fréttunum með jafnaðargeði og talið það mikilvægt að fá að vita að dæmdur barnaníðingur komi til með að búa í sama húsi og börn þeirra séu vistuð.

Dagmamman segir engu að síður að atvinnuöryggi sínu sé stefnt í hættu með þessu. Það sé ekki þægilegt að reka dagvistun í sama húsi og maður sem hlotið hefur dóm fyrir alvarleg kynferðisbrot gegn börnum. Hún tekur þó fram að visst öryggi felist í því að vita af manninum. Þannig sé hægt að gera ráðstafanir til að tryggja öryggi barnanna í húsinu.