Afmælisrit SUS um Davíð Oddsson sextugan

Samband ungra sjálfstæðismanna vinnur nú að útgáfu rits til heiðurs Davíðs Oddssyni, fyrrverandi formanni Sjálfstæðisflokksins og forsætisráðherra. Davíð verður sextugur þann 17. janúar næstkomandi.

Titill ritsins verður Davíð Oddsson í myndum og máli. 1948-2008. Gert er ráð fyrir að í því verði ljósmyndir frá sextíu árum ævi hans, fengnar úr myndabókum hans, safni Sjálfstæðisflokksins, blöðum, frá ljósmyndurum og einstaklingum.

„Þarna verða mjög margar merkilegar myndir, sem fæstar hafa komið áður fyrir almenningssjónir. Vð ætlum einnig að hafa kafla úr ræðum og ritum Davíðs. Við viljum gefa góða mynd af ferli Davíðs Oddssonar, sem hefur náttúrulega verið mjög glæsilegur," segir Davíð Örn Jónsson sem situr í ritstjórn ritsins.

Ásamt Davíð sitja í ritstjórn þeir Borgar Þór Einarsson, Gísli Baldur Gíslason og Hannes Hólmsteinn Gissurarson.