Íslendingum boðið að kynna jarðvarmann í Brussel

Íslendingum hefur verið boðið að kynna möguleika á sviði jarðvarma í Brussel í lok janúar en þá stendur Evrópusambandið fyrir kynningarviku um endurnýjanlega orkugjafa. Þetta kom fram á fundi Össurar Skarphéðinssonar iðnaðarráðherra og Andris Piebalgs, en hann er yfirmaður orkumála í framkvæmdastjórn ESB.

„Á fundinum kynnti iðnaðarráðherra framkvæmdastjóranum áform Íslendinga um að koma virkjun jarðvarmaorku á dagskrá í heiminum, og upplýsti hann um að Íslendingar væru nú þegar að undirbúa á annan tug jarðvarmavirkjana í löndum Evrópu," segir í tilkynningu frá iðnaðarráðuneytinu. „Jafnframt greindi hann framkvæmdastjóranum frá áætlunum Íslendinga um að nýta jarðvarma til að vinna gegn orkufátækt í löndum Austur-Afríku, og stuðla að því að íbúar viðkomandi landa ættu kost á grænni, endurnýjanlegri orku á viðráðanlegu verði."

Piebalgs bauðst einnig til þess að hafa milligöngu um að tíu evrópskum blaðamönnum verði boðið til Íslands áður en kynningarvikan gengur í garð til þess að kynna sér og fjalla um þá möguleika sem Íslendingar telja liggja á sviði jarðvarmaorku.