Óljóst hvort þingsköp voru brotin

„Ég á eftir að fara yfir málið með þeim varaforseta og starfsmanni sem stóð vaktina," segir Sturla Böðvarsson, forseti Alþingis, um þingfund í gær. Hann vildi ekki tjá sig um það hvort þingsköp hefðu verið brotin þegar skyndileg breyting varð á dagskrá þingfundar í gær. Björn Bjarnason dómsmálaráðherra átti samkvæmt dagskrá að kynna frumvarp um breytingar á hegningalögum. Sturla Böðvarsson var fjarverandi og Kjartan Ólafsson varaforseti var í forsetastól.

Þegar Björn hafði sagt nokkur orð í ræðustól varð forseta ljóst að hann væri ekki að flytja það mál sem var á dagskrá þingsins og gerði við það athugasemd. „Hæstvirtur dómsmálaráðherra. Hér var kynnt inn 1. dagskrármál fundarins, almenn hegningarlög, en okkur heyrist sem verið sé að kynna 2. dagskrármálið sem er 190. mál. Ég vil bara upplýsa …)," sagði Kjartan.

Dómsmálaráðherra svaraði þá: „Já, ég taldi mig vita hvaða mál ég væri að tala um en það er gott að forseti vakti athygli mína á því." Ráðherra hélt svo áfram að kynna frumvarp um almannavarnir.

„Það verða þarna ákveðin mistök þegar Björn ruglast á dagskránni. Ég vek athygli þingmanna á þessu, þannig að þeir sem vildu tjá sig um almannavarnarfrumvarpið gætu sett sig á mælendaskrá," segir Kjartan.

Kjartan þvertekur fyrir það að þetta atvik sé til marks um yfirgang framkvæmdavaldsins gagnvart þinginu. „Björn var byrjaður á ræðunni og átti ekkert að hætta. Það hefði ekki haft neitt upp á sig. Hins vegar þurftu þingmenn að átta sig á því að breyting hefði orðið á dagskránni," segir Kjartan.