Meira en helmingur ók of hratt um Víkurveg

Fimmtíu og fimm prósent ökumanna sem óku Víkurveg í norðurátt að Hallsvegi í Grafarvogi á einni klukkustund í gær fóru of hratt og eiga von á sektum frá lögreglu. Þetta kemur fram í tilkynningu frá lögreglunni.

Þar segir að alls hafi brot 128 ökumanna verið mynduð á veginum á einni klukkustund fyrir hádegi en 232 fóru um veginn á þeim tíma. Meðalhraði hinna brotlegu var 68 kílómetra á klukkustund en þarna er 50 kílómetra hámarkshraði. Sá sem hraðast ók var mældur á 101. Samkvæmt þessari vöktun er ekki gott ástand á Víkurvegi hvað umferðarhraða varðar, segir lögregla.