Afhenda ekki bíla úr bílakirkjugarði

Almenningur getur ekki fengið afhenta bíla sem fargað hefur verið í endurvinnslu Hringrásar í Sundahöfn. Tryggvi Sigurðsson skrifstofustjóri fyrirtækisins segir að almennt sé fólk að henda rúmlega 14-15 ára gömlum bílum. Þeir nýjustu séu um 10 ára. Bílarnir eru nánast allir það illa farnir að ekki borgi sig að gera við þá; „Þess vegna er fólk að losa sig við þá,“ segir Tryggvi.

Þegar eigandi bifreiðar kemur með bíl til Hringrásar fær hann skilavottorð. Þetar búið er að leggja það inn er bíllinn skráður út úr kerfinu og eigandanum greitt skilagjald sem er 15 þúsund krónur. Þá er fyrirtækinu ekki leyfilegt að afhenda öðrum bílinn. „Þetta eru reglur frá ríkinu og þeim getum við ekki breitt"

Tryggvi segir að einstaka sinnum sé hringt og spurt um bíla. Hann segir mjög sjaldgæft að heillegir bílar komi inn. „Ef bíll kemur hingað inn sem lítur vel út, er yfirleitt eitthvað mikið að honum sem ekki er sýnilegt. Það kemur vissulega fyrir að bíll sé heillegur, en það er afar sjaldgæft."

„Þetta er brotajárnsfyrirtæki, ekki partasala og ekki bílasala heldur."

Hjá Hringrás eru bílarnir pressaðir og sendir út. Allt sem hægt er að nýta er brætt, ál, járn og allt ryðfrítt. Þá er talað um gífurlegan orkusparnað við endurvinnsluna, „því það er mun ódýrara að framleiða járn með endurvinnslu en að framleiða nýtt járn," segir Tryggvi.

Hjá Vöku sem einnig sér um förgun bíla, er hægt að fá varahluti úr ónýtum bílum. Tekið er lágmarksgjald fyrir það. En fyrirtækið afhendir ekki bíla í heilu lagi af sömu ástæðum og Hringrás.