Ofbeldi gegn kynferðisafbrotamönnum fer minnkandi

Sigurbjörn Sævar Grétarsson sem hlaut fjögurra ára fangelsisdóm fyrir kynferðislegt ofbeldi var í viðtali við Kastljósið fyrr í kvöld. Þar sagði hann meðal annars að ofbeldi gegn kynferðisafbrotamönnum innan veggja fangelsins hafi minnkað á síðustu 2-3 árum.

Sigurbjörn sem lýkur afplánun á næstu dögum sagði fanga sem hlotið hafi dóm fyrir kynferðisbrot vera inni á sér deild og komi ekkert þaðan út. "Það koma auðvitað upp vandamál þar sem er öskrað og annað slíkt. Og skiljanlega eru fordómar út í þessa fanga," sagði Sigurbjörn í viðtalinu.

Sigurbjörn sagði hinsvegar að fordómarnir hefðu minnkað á síðustu árum en þegar hann kom inn voru það nánast óskrifuð lög að komið var illa fram við þessa einstaklinga. "Það var hrækt á mig, ég var kýldur, það var sparkað í mig og ég kallaður öllum illum nöfnum. En á þessum tíma fannst mér ég eiga það skilið og augu mín voru að opnast fyrir því sem ég gerði," sagði Sigurbjörn sem sér mikið eftir broti sínu og hefur unnið mikið í sínum málum.

Einnig kom fram í máli Sigurbjörns að hann vilji að nágrannar dæmdra kynferðisbrotamanna verði látnir vita hverskonar menn eru þar á ferð.