Kæra gæsluvarðhaldsúrskurð vegna meintrar nauðgunar

Karlarnir tveir sem handteknir voru vegna gruns um að hafa nauðgað rúmlega fertugri konu í miðbæ Reykjavíkur um síðustu helgi hafa kært gæsluvarðhaldsúrskurð yfir þeim til Hæstaréttar.

Þeir voru í héraðsdómi úrskurðaðir í gæsluvarðhald til 19. nóvember vegna málsins. Eftir því sem fram kemur í tilkynningu frá lögreglu hittist fólkið á krá og varð samferða þaðan út. Mönnunum er gefið að sök að hafa svo dregið konuna inn í húsasund og nauðgað henni þar. Konan hlaut töluverða áverka við nauðgunina en hún leitaði á Neyðarmóttöku eftir árásina og einnig til lögreglu.

Lögregla segir rannsókn málsins á frumstigi og ekki sé unnt að veita frekari upplýsingar að svo stöddu. Það er kynferðisbrotadeild lögreglu höfuðborgarsvæðisins sem vinnur að rannsókn málsins.