Gruna að fíkniefni hafi verið fjármögnuð með smyglgróða

Lögreglan kannar nú hvort fíkniefnin sem haldlögð voru á Fáskrúðsfirði í haust hafi verið fjármögnuð með tveggja ára gömlum smyglgróða.

Samkvæmt heimildum Vísis hefur lögreglan vísbendingar um að töluvert magn fíkniefna hafi verið smyglað hingað til lands með skútunni Lucky Day árið 2005.

Sömu heimildir herma að lögreglan ransaki nú hvort gróðinn af þeirri ferð hafi verið notaður til að fjármagna kaupin á efnunum sem náðust í aðgerð lögreglunnar á Fáskrúðsfirði í september en þá voru haldlögð um 40 kíló af fíkniefnum.

Eins og Vísir hefur áður greint frá var skútunni Lucky Day siglt hingað til lands frá Noregi árið 2005. Heimamenn á Fáskrúðsfirði sögðu í samtölum við Vísi að margt hefði verið líkt með vinnubrögðum skipverja skútunnar þá og þeirra sem lögreglan handtók nú í september.

Eigandi skútunnar er Logi Freyr Einarsson en bróðir hans, Einar Jökull sem nú situr í varðhaldi, sigldi henni til Fáskrúðsfjarðar ásamt öðrum manni árið 2005. Þegar þangað var komið var skútan yfirgefinn. Logi Freyr greiddi af henni hafnargjöld en hún var svo loks sótt í maí í fyrra.

Þá strax vöknuðu grunsemdir um að Lucky Day væri mögulega viðriðin fíkniefnasmygl. Sá grunur mun hafa styrkst enn frekar þegar Fáskrúðsfjarðarmálið kom upp nú í september.

Lögreglan hefur í rannsókn sinni undanfarnar vikur safnað upplýsingum er varða ferðir Lucky Day árið 2005 í von um að upplýsa hvort þar hafi verið lagður grunnur að einu stærsta fíkniefnamáli Íslandssögunnar.