Bolað út vegna brúðkaups aldarinnar

Listamenn sem fyrirhuguðu opnun sýningar á verkum sínum í Grafíksafninu næsta laugardag eru afar ósáttir við að þurfa að fresta sýningunni um viku vegna brúðkaups Jóns Ásgeirs Jóhannessonar og Ingibjargar Pálmadóttur.

Brúðkaupsveisla parsins verður í Listasafni Reykjavíkur eftir athöfn í Dómkirkjunni 17. nóvember næstkomandi. Komið hefur verið fyrir einhvers konar tjaldi, eða færanlegri byggingu aftan við húsið sem lokar fyrir aðgang að Grafíksafninu.

„Maður kemst ekki einu sinni inn til að setja sýninguna upp," segir Pjetur Stefánsson sem hefur unnið að undirbúningi í heilt ár ásamt Þóri Sigmundssyni. „Við vorum búnir að segja fullt af fólki frá sýningunni og boðskortið var komið í prentvélina þegar við fengum skilaboð um að búið væri að tjalda yfir salinn og við gætum ekki sett sýninguna upp vegna brúðkaupsins." Pétur segir að náðst hafi að stöðva prentun boðskortanna á elleftu stundu.

Kolbrún Jónatansdóttir framkvæmdastjóri Bílastæðasjóðs sem rekur bílastæðin segist ekki hafa vitað til þess að lokað yrði fyrir innganginn að Grafíksafninu með þessum hætti. Henni þyki miður að svo skuli vera en ákvörðun um tjaldið hafi ekki verið á hennar könnu. Á umræddu svæði séu 15-20 bílastæði sem leigð eru á 1.600 krónur hvert fyrir sólarhringinn. Svæðið er leigt í tvær vikur vegna undirbúnings og frágangs og er heildarleiga því um 400 þúsund krónur fyrir tímabilið.

Pjetri og Þór var tilkynnt um fyrirkomulagið af stjórnarmanni Grafíkfélagsins síðastliðinn föstudag. „Það er ekki einungis valtað yfir einstaklinga með þessum hætti, heldu tjaldað yfir okkur líka," segir Pjetur.

Hrólfur Jónsson sviðsstjóri framkvæmdasviðs segir að reynt hafi verið að hafa samstarf og samvinnu við alla sem málið snerti. Honum hafi ekki verið kunnugt um fyrirhugaða sýningu.

Kolbrún segir að bílastæði séu leigð út hér og þar um borgina fyrir sérstaka atburði. Hún nefnir sem dæmi lokun vegna Airwaves tónlistarhátíðarinnar sem hafi þó einungis staðið í einn sólarhring.

Eftir stendur að Pjetur og Þór þurfa að fresta opnun sýningarinnar um eina viku og verður hún því opnuð 24. nóvember. „Ef ég væri Kjarval þá myndi ég halda sýninguna fyrir utan tjaldið, en ég bíð rólegur og opna viku seinna," segir Pjetur.