Lögregla hefur fengið ábendingar vegna heimsíðu rasista

Lögreglu hefur borist töluvert af ábendingum er varða heimasíðuna skapari.com eftir að Vísir fjallaði um hana í síðustu viku. Á síðunni er að finna áróður fyrir kynþáttahyggju og nafngreindum íslenskum einstaklingum hótað ofbeldi.

Friðrik Smári Björgvinsson segir að ábendingar hafi borist frá almenningi sem kunni að verða að notum við rannsókn málsins. Hún sé enn á frumstigi en verið sé að kanna hvort og hvaða lög hafi verið brotin með skrifunum á síðunni.

Enginn hefur verið kallaður í skýrslutöku vegna málsins en Friðrik vill ekki svara því hvort lögreglan viti hver standi á bak við skrifin á síðunni.

Eins og fyrst kom fram á Vísi í síðustu viku er skráður eigandi síðunnar Hal Turner en sá er frægur fyrir öfgafullar og ofbeldisfullar skoðanir sínar.