Vilja ekki að orkuöflung og -dreifing verði í höndum einkaaðila

Meirihluti Suðurnesjamanna er andvígur því að orkuöflun og -dreifing verði á höndum einkaaðila. Þetta má ráða af viðtökum við undirskriftasöfnun síðustu daga.

5169 kjósendur á Suðurnesjum skrifuðu undir áskorun til sveitarstjórnarmanna á svæðinu þess efnis að orkuöflun og -dreifing verði ekki í meirihlutaeigu einkaðaila. Hannes Friðriksson, íbúi í Reykjanesbæ, stóð fyrir undirskriftasöfnuninni og hann afhenti stjórn Sambands sveitarfélaga á Suðurnesjum undirskriftirnar um helgina.

Hannes sagðist ánægður með viðbrögð Suðurnesjamanna. 51 prósent kjósenda í síðustu sveitarstjórnarkosningum á Suðurnesjum hefði skrifað undir. „Ég er miklu, miklu meira en sáttur. Ég reiknaði með 2000 í byrjun en ég kominn 3000 fram yfir það þannig að þetta held ég að sýni hver vilji fólksins er gagnvart Hitaveitu Suðurnesja," sagði Hannes.