Loka einni deild daglega vegna manneklu

Daglega þarf að loka einni deild á leikskólanum Fífusölum í Kópavogi vegna manneklu. Leikskólastjórinn segir að ef ekkert verði að gert eigi ástandið eftir að versna því uppsagnir taki gildi á næstu mánuðum.

Mikið var fjallað um manneklu leikskólanna í haust en lítið hefur heyrst síðustu vikur. Ástandið er þó ekki alls staðar í himnalagi. Á leikskólanum Fífusölum í Kópavogi hefur til að mynda síðastliðnar fjórar vikur þurft að loka einni deild á dag vegna manneklu. Það þýðir að sjötta hvern virkan dag þurfa foreldrar að vera fjarverandi frá vinnu eða finna önnur ráð með dagvistun.

Auk þess er ekki verið að fullnýta plássin á skólanum en ellefu börn hafa ekki komist að vegna manneklunnar. María K. Lárusdóttir leikskólastjóri segir þrjá starfsmenn vanta til að fullmanna skólann og ef ekki tekst að ráða í þær stöður eigi ástandið eftir að versna því þrír starfsmenn hætta um áramót og einn í febrúar. Fljótlega gæti því samtals sjö vantað á skólann.

María var í samtali við fréttastofu í morgun ekki í vafa um hvað þyrfti til að laða starfsmenn að leikskólunum, hækka laun og fækka börnum á hvern starfsmann.