Verð á varanlegum þorskvóta í methæðum

Verð á varanlegum þorskkvóta er komið upp í fjögur þúsund krónur kílóið og hefur aldrei verið nándar nærri svo hátt.

Það hefur tvöfaldast á skömmum tíma og sjá hagsmunaaðillar í sjávarútvegi ekki fram á að það muni lækka á næstunni. Leiguverð hefur líka rokið upp og er skýringin á þessum hækkunum fyrst og fremst sú að eftir að þorskaflaheimildir voru skornar niður um þriðjung skortir margar útgerðir þorskkvóta til að mæta þeim þorski sem óhjákvæmilega veiðist með öðrum tegundum.

Skipstjórar benda á að nær ógjörningur sé að ná ýsukvótanum á þessu fiskveiðiári án þess að veiða eitthvað umfram þorskveiðiheimildir. Það blasi því tvennt við, annars vegar nái útgerðir ekki að veiða kvóta sína af öðrum tegundum vegna skorts á þorskkvóta og hins vegar að sjómenn freistist til þess að grípa til brottkasts, með öðrum orðum fari að henda þorskinum til að ná kvótanum í öðrum tegundum.