Kanna hvort hægt er að endurheimta fyrri stærð Hagavatns

Landsgræðsla ríkisins, Bláskógabyggð, landeigendur Úthlíðartorfunnar og Orkuveita Reykjavíkur hyggjast kanna hvort hægt er að endurheimta fyrri stærð Hagavatns sem er sunnan Langjökuls.

Fram kemur í tilkynningu frá Landgræðslunni að markmiðið með þessu sé að hefta sandfok sunnan Langjökuls og verða möguleikar á raforkuframleiðslu þar kannaðir samhliða, en Orkuveitan hefur uppi hugmyndir um að reisa þar vatnsaflsvirkjun.

Þetta er ekki fyrsta sinn sem kostir þess að endurheimta fyrri stærð Hagavatns eru skoðaðir því fyrir áratug stóð Landsgræðslan fyrir mati á umhverfisáhrifum stækkunar vatnsins með stíflugerð.

Sveitarstjórn Bláskógabyggðar hefur ályktað um að mikilvægt sé að færa yfirborð Hagavatns til fyrra horfs til að hefta sandfok og tryggja árangur annars uppgræðslustarfs sem hún hefur tekið þátt í um árabil. Í því augnamiði átti sveitarstjórn þátt í því að ráðist var í mat á umhverfisáhrifum stækkunar Hagavatns árið 1997.

Bent er á í tilkynningu Landgræðslunnar að í þurrkum síðastliðins sumars var uppblástur sérstaklega mikill og þéttur uppblástursmökkur lá yfir byggðinni í Bláskógabyggð svo dögum skipti.