Hugarafl eykur sjálfstraust

Hugarafl hefur aukið sjálfstraustið og hjálpað okkur að komast aftur út samfélagið, segir maður sem átt hefur við þunglyndi að stríða í tæpa tvo áratugi og ekki verið á vinnumarkaði í fimm ár.

Hugarafl eru samtök fyrir fólk með geðsjúkdóma sem dottið hefur út af vinnumarkaði og vill komast aftur út í samfélagið á sínum hraða. Hátt í tuttugu manns sem eiga við margvíslega geðsjúkdóma að stríða hittast reglulega í höfuðstöðvum Hugarafls og deila sinni lífsreynslu. Þórey Guðmundsdóttir er 24 ára gömul og hefur glímt við þunglyndi og kvíðaröskun frá því hún var barn.

Þórey ákvað að taka á sínum málum og sótti fundi hjá Hugarafli sem gaf henni tilgang að nýju.

Steindór J.Erlingsson er um fertugt og hefur glímt við þunglyndi í tæp 20 ár. Hann var sjálfboðaliði hjá Rauða krossinum í Eþíópíu þegar hann var tvítugur og segist hafa orðið fyrir skelfilegri lífsreynslu þar. Sú reynsla hafi haft mikil áhrif á hann og við tók gríðarlegt þunglyndi.

Steindór hefur ekki treyst sér til að fara út á vinnumarkaðinn en menntaði sig í staðinn og notaði námið sem undankomuleið. Hann er með Bs próf í líffræði og masters og doktorspróf í vísindasagnfræði.

Nú hefur Steindór verið í nokkurn tíma hjá Hugarafli og segir það hafa breytt lífi sínu.