Forngripur bættist óvænt í vörslu Þjóðminjasafnsins

Sannkallaður forngripur bættist óvænt í vörslu Þjóðminjasafnsins í dag, þegar fólki bauðst að koma með hluti til aldursgreiningar.

Þjóðminjasafnið bauð fólki uppá það í dag að koma með muni sem leyndust í fórum þeirra á safnið til að láta aldursgreina þá og meta. Fjöldi fólks kom á staðinn með eitt og annað sem það hafði áhuga á að fræðast meira um. Má þar nefna teppi, skartgripi, gyltstokkabelti, rúmfjöl og prjónastokk. Margir biðu lengi og rétt fyrir lokun gerðist nokkuð sem var biðarinnar virði.

Inn kom kona með exi sem hún fann við Þjórsá sem reyndist vera frá 12. öld. Lilja Árnadóttir, fagstjóri munasafns Þjóðminjasafnsins segir að nú verði farið í það að kortleggja nákvæmlega hvar exin fannst við Þjórsá.