Framsókn: Vilja standa vörð um Íbúðalánasjóð

Standa verður vörð um Íbúðalánasjóð og tryggja almenningi eðlilegt aðgengi að fjármagni til kaupa á eigin húsnæði á kjörum sem hægt er að lifa við. Þetta kemur fram ályktun miðstjórnar Framsóknarflokksins. Ályktunin var samþykkt á miðstjórnarfundi flokksins á Akureyri í gær.

Í ályktuninni lýsir miðstjórnin yfir andstöðu við framkomnar hugmyndir um einkavæðingu í heilbrigðisþjónustu og varar við tvöföldu heilbrigðiskerfi. Ennfremur er lýst yfir áhyggjum af sinnuleysi ríkisstjórnarinnar í efnhagsmálum sem að mati miðstjórnar Framsóknarflokksins mun leiða af sér veikari stöðu heimilanna og atvinnulífsins.

Þá segir ennfremur í ályktuninni að miðstjórnin fagni útrás íslenskrar þekkingar og reynslu á sviði orkumála og að mikilvægt sé að halda áfram á sömu braut. Miðstjórnin ítrekar þó að tryggja verði að landsmenn fái greiddan arð af sameiginlegum auðlindum og að hann renni í sérstakan auðlindasjóð. Jafnframt vill miðstjórnin að tryggt verði að auðlindir landsins sem í dag eru í eigu opinberra aðila verði áfram í samfélagslegri meirihlutaeign eins og segir í ályktuninni.

Að lokum lýsir miðstjórnin yfir vonbrigðum með þær aðgerðir sem ríkisstjórnin hefur boðað til að mæta skerðingu aflaheimilda í þorski. Eru þær sagðar ómarkvissar og gagnast þeim illa sem verða hvað harðast úti vegna skerðingarinnar.