Segir ákvörðun Landsvirkjunar ekki hafa áhrif á álver í Helguvík

Árni Sigfússon, bæjarstjóri í Reykjanesbæ segir ákvörðun Landsvirkjunar að selja ekki orku til álvera á suðvesturhorni landsins ekki hafa áhrif á byggingu álvers í Helguvík. Samningar við Orkuveituna og Hitaveitu Suðurnesja ættu að tryggja næga orku.

Stjórn Landsvirkjunar tilkynnti á föstudag að hún hefði ákveðið að hætta öllum viðræðum um sölu á raforku til nýrra álvera á suðvesturlandi og ræða þess í stað við netþjónafyrirtæki og fyrirtæki á sviði kísilhreinsunar fyrir sólarrafala. Undanfarin misseri hefur Landsvirkjun átt í viðræðum við aðila sem hafa áhuga á að byggja ný álver í Helguvík, Þorlákshöfn og Keilisnesi varðandi sölu á raforku frá væntanlegum virkjunum í Þjórsá en þar verður samtals hægt að virkja um 250 megavött. Bæjarstjórinn í Reykjanesbæ segist ekki óttast að þessi ákvörðun Landsvirkjunar setji byggingu álvers í Helguvík í uppnám. Árni segir að ekki hafi verið gert ráð fyrir að það þyrfti að leita til Landsvirkjunar með fyrsta áfanga álversins við Helguvík, samningar hafi verið gerðir við Hitaveitu Suðurnesja og Orkuveituna sem ættu vel að nægja. Árno hefur því engar áhyggjur af því að ekkert verði af byggingu álversins.