Útafakstur og bílvelta í Öxnadal

Bílvelta varð í Öxnadal við Miðland um klukkan hálf fjögur í dag. Stúlkan, sem keyrði bílinn, var flutt á slysadeild en meiðsl hennar eru ekki talin alvarleg. Bíllinn var fluttur í burtu með kranabíl.

Samkvæmt upplýsingum frá lögreglunni á Akureyri er talið að stúlkan hafi misst stjórn á bílnum vegna hálku með fyrrgreindum afleiðingum. Hún var ein í bílnum. Að sögn lögreglunnar fór stúlkan upp á þjóðveg eftir slysið og reyndi að veifa á hjálp. Nokkrir keyrðu framhjá áður en vegfarandi kom stúlkunni til aðstoðar.

Þá var bíl ekið útaf veginum á svipuðum stað um klukkutíma síðar eða um klukkan hálf fimm í dag. Tveir voru í bílnum en þá sakaði ekki. Bíllinn hafnaði út í nærliggjandi á en hann var ökufæru ástandi eftir óhappið. Að sögn lögreglunnar á Akureyri er mikil hálka á vegum.