Tveir slasast illa í bílveltu

Þyrla Landhelgisgæslunnar, TF Líf, var kölluð út um klukkan hálf níu í morgun til að ná í tvo karlmenn sem slösuðust illa þegar jeppi sem þeir voru í fór útaf veginum á Suðurlandsvegi til móts við Skálabæi undir Eyjafjöllum.

Samkvæmt upplýsingum frá lögreglunni á Hvolsvelli lítur út fyrir að ökumaður jeppans hafi misst hann út í vegkantinn með þeim afleiðingum að hann fór út af veginum og valt að minnsta kosti tvisvar áður en hann lenti á hjólunum. Tveir menn voru í bílnum báðir á fimmtugsaldri og slösuðust þeir illa.

Það var vegfarandi sem gerði lögreglunni viðvart um slysið um klukkan hálf níu í morgun. Í kjölfarið var kallað á þyrlu Landhelgisgæslunnar til að flytja mennina á slysadeild Landspítalans í Reykjavík. Engin hálka var á veginum en bíllinn er talinn gjörónýtur. Nota þurfti klippur til að ná mönnunum út.

Þyrlan lenti við Landspítalann í Fossvogi með mennina laust eftir klukkan ellefu í morgun. Ekki hafa fengist upplýsingar um líðan þeirra að svo stöddu.