Tveir fluttir á slysadeild eftir útafakstur

Tveir voru fluttir á slysadeild á Akureyri eftir að bifreið fór útaf veginum í Norðurárdal í námunda við Fremra-Kot um klukkan hálf eitt í nótt.

Ökumaður missti stjórn á bíl sínum í hálku með þeim afleiðingum að hann rakst á hálfkarað vegrið og fór fram af kletti. Bíllinn féll nokkra metra áður en hann hafnaði á hliðinni. Að sögn lögregunnar á Sauðárkróki slösuðust ökumaður og farþegi ekki illa en bíllinn var í óökufæru ástandi eftir slysið.

Þá fór annar bíll útaf veginum í mynni Norðurárdals um klukkan hálf átta í gærkvöldi. Ökumaður, sem er karlmaður á fertugsaldri, missti stjórn á bílnum í hálku. Ökumaður kvartaði undan eymsli í öxl en öðru leyti var hann ómeiddur. Bíllinn var fjarlægður með kranabíl

Að sögn lögreglunnar á Sauðárkróki er mikil hálka á Öxnadalsheiði og eru ökumenn beðnir um að fara varlega.