Ekki til rýmingaráætlun vegna skotárása í skólum á Íslandi

Ekki er til sérstök rýmingaráætlun í skólum í Reykjavík ef til skotárásar kæmi þar. Fræðslustjóri menntasviðs Reykjavíkur segir athugandi að skólar hér á landi geri slíka áætlun.

Atburðirnir í Tuusula hafa vakið óhug. Fréttir hafa áður borist af skotárásum í skólum í Bandaríkjunum en fréttir af fjöldamorðum í skólum á Norðurlöndum eru eitthvað sem ekki hefur þekkst. Slíkir atburðir kalla á vangaveltur um hvernig staðið er að öryggismálum í skólum hér á landi ef rýma þarf skóla í skyndi vegna árásar.

Hér á landi hafa verið gerðar sérstakar rýmingaráætlanir fyrir grunnskóla en yfirleitt hafa slíkar áætlanir verið gerðar með eldsvoða í huga. Ekki hefur farið fram sérstök umræða um hvernig brugðist yrði við ef skotárás kæmi upp í skóla en Ragnar Þorsteinsson, fræðslustjóri menntasviðs Reykjavíkur, segir athugandi að gera slíka rýmingaráætlun fyrir skólana. Hann leggur áherslu á mikilvægi forvarna í skólum til að koma í veg fyrir atburði eins og gerðust í Tuusula. Liður í því sé að vinna gegn einelti og byggja upp sjálfstraust og efla félagsfærni nemendanna.