Nýr kafli í atvinnusögu þjóðarinnar

Össur Skarphéðinsson iðnaðarráðherra segir þá ákvörðun Landsvirkjunar að hefja viðræður um raforkusölu frá virkjunum, sem á að reisa í neðri Þjórsá, til fyrirtækja sem hafa áhuga á að reka netþjónabú eða verksmiðju til kísilhreinsunar hér á landi sýna að nýr kafli sé hafinn í atvinnusögu þjóðarinnar.

Össur segist hafa orðið var við mikinn áhuga hjá fjölmörgum aðilum á að koma á fót hér iðnaði sem mengi lítið eða ekkert. Hann hafi sjálfur rætt við forsvarsmenn félaga sem vilji reisa hér netþjónabú og við þrjá aðila sem hafi áhuga á að byggja verksmiðju til kísilhreinsunar. Forsendan sé þó að orkan sé fyrir hendi.

Hann segir tíðindin marka nýjan kafla í atvinnusögu Íslendingar. „Með þessum aðgerðum og ýmsum öðrum, svo sem að leggja nýjan sæstreng, getum við skapað fjölmörg ný tækifæri og skotið fleiri stoðum undir atvinnulífið og það mun ríkisstjórnin gera," segir Össur.

Tölverðar deilur hafa verið um virkjanirnar þrjár sem Landsvirkjun hyggst reisa í neðri hluta Þjórsár. Spurður hvort þessi stefnubreyting komi til með að skapa meiri sátt um virkjanirnar segir Össur að hann geti ekki fullyrt um það. Það séu sterkar tilfinningar sem tengist virkjununum og það verði að koma í ljós hver niðurstaðan verði.