Málefni REI rædd á eigendafundi OR eftir viku

Eins og kunnugt er ákvað borgarráð að hafna samruna REI og Geysis Green Energy sem samþykktur var á eigenda- og stjórnarfundi Orkuveitunnar í byrjun október. Var stjórn Orkuveitunnar falið að ganga frá málinu og samþykkti hún í síðustu viku að fela stjórnarformanninum Bryndísi að ganga til viðræðna við þá sem aðild eiga að sameinuðu félagi.

Aðspurð segir Bryndís að hún sé að vinna þessa dagana að tillögum til lausnar málsins. Hún segist hafa rætt við mjög marga sem komi að samrunanum og muni halda áfram að gera það og finna nýjan farveg fyrir útrás REI. Aðspurð hvort hún komi til með að leggja fram tillögur á eigendafundinum eftir viku segir Bryndís: „Eigendafundur ræðir þá stöðu sem upp verður þá. Við munum vanda okkur í vinnunni að farsælli niðurstöðu í málinu."

Fréttir hafa borist af því að Bjarni Ármannsson hugsi alvarlega stöðu sína innan REI vegna þess hve hægt málefni félagsins ganga. Aðspurð hvort hann hafi viðrað þá skoðun að hverfa úr félaginu við hana segir Bryndís að Bjarni hafi lýst sínum skoðunum á málinu í fjölmiðlum. „Ég sýni því virðingu og skilning að margir vilji að málið skýrist sem fyrst. Við verðum hins vegar að ígrunda hvert skref vel og rasa ekki um ráð fram," segir Bryndís. Verkefni stjórnar Orkuveitunnar sé að finna grundvöll þar sem hagsmunir Orkuveitunnar og REI verði sem best tryggðir.

Spurð hvor til greina komi að REI og Geysir Green starfi áfram saman að útrásinni segir Bryndís margar vangaveltur uppi en ótímabært sé að fjalla um það hvað verði hugsanlega ofan á.

Gunnar tekur undir skoðun Dags

Gunnar Sigurðsson, fulltrúi Akraneskaupstaðar í stjórn OR, lét bóka á fundinum í dag að hann tæki undir þá skoðun sem Dagur B. Eggertsson borgarstjóri viðraði á fundi með starfsmönnum Orkuveitunnar í gær. Þar sagði Dagur að Orkuveitan yrði áfram í útrás og þá útilokaði hann ekki áframhaldandi samstarf við Geysi Green Energy líkt og nýleg ákvörðun um áframhaldandi verkefni á Filippseyjum sýndi.

Gunnar sagði enn fremur að hann teldi að stjórn og eigendur Orkuveitunnar ættu að standa einhuga á bak við fyrirtækið og starfsfólk þess í þeim mikilvægu og vandasömu verkefnum sem Orkuveitan og starfsfólkið ynni fyrir eigendur sína.