Dæmd fyrir að smygla mjög hreinu kókaíni

Við yfirheyrslur vísaði önnur konan á manninn og var hann handtekinn. Maðurinn viðurkenndi að hafa ætlað að flytja efnin inn en það hefði verið fyrir annan mann sem hann nafngreindi ekki. Þá sagðist hann enn fremur hafa ætlað að selja hluta af efnunum sjálfur. Hann mun hafa fengið stúlkurnar til þess að vera burðardýr og var þeim lofað 400 þúsund krónum fyrir að smygla efnunum. Dómarinn leit svo á að þau hefðu saman staðið að innflutningnum en að maðurinn hefði skipulagt hann í því skyni að selja efnin.

Við ákvörðun refsingar var meðal annars horft til þess hversu mikið magn var að ræða og hversu sterkt það var. Fram kemur í dómnum að það hafi verið 80 prósent sterkur kókaínbasi og því hefði mátt drýgja efnin töluvert. Var það til refsiþyngingar.

Horft var til þess að önnur stúlkan hafði sagt til mannsins og þá var einnig horft til þess að hvorug kvennanna átti sakaferil að baki. Maðurinn var hins vegar á skilorði og var tekið tillit til þess. Þá þótti dómnum alvarlegt að maðurinn hefði reynt að hylja slóð sína með því að kaupa burðardýr til smyglsins og þá hefði hann villt á sér heimildir í samskiptum sínum við konurnar.

Til frádráttar dómunum yfir fólkinu var gæsluvarðhald sem það sætti í febrúar vegna málsins. Þá voru þremenningarnir dæmdir til að greiða samtals um eina og hálfa milljón í málsvarnarlaun auk sakarkostnaðar upp á rúmar 230 þúsund krónur.