Innlent

Vildu bæjarstjórann úr starfi vegna dóms

Minnihlutinn á Álftanesi krefst þess að bæjarstjórinn fái lausn frá störfum nú þegar vegna dóms Héraðsdóms Reykjaness um launadeilu bæjarstjórans við fyrrverandi starfsmann sinn. Fulltrúi meirihlutans sakar bæjarfulltrúa D-listans um ítrekaðan persónulegan og níðingslegan málflutning um bæjarstjórann.

Sigurður Magnússon, bæjarstjóri á Álftanesi, á fyrirtæki sem heitir Margfeldi ehf. og var fyrirtækinu gert að greiða fyrrverandi starfsmanni tæpar sautján hundruð þúsund krónur með dráttarvöxtum og málskostnað. Í tilefni af þessum dómi, sem féll í Héraðsdómi Reykjaness á þriðjudag, lagði minnihlutinn í bæjarstjórn Álftaness fram vantrauststillögu á bæjarstjórann. Tillagan um að bæjarstjórinn fengi lausn frá störfum nú þegar var felld.

Bæjarstjórinn bókaði á fundinum í gær að fyrirtæki hans Margfeldi hefði með óheppilegum hætti dregist inn í deilu eftir að blástursfyrirtæki sem var í eigu Margfeldis um skamman tíma á síðasta ári var selt síðastliðið sumar.

Forseti bæjarstjórnar gerði alvarlegar athugasemdir við málflutning minnihlutans og sakaði hann um ítrekaðan persónulegan og oft níðingslegan málflutning. Menn sem þurfi opinberlega að níða aðra bæjarfulltrúa ættu að draga sig í hlé frá störfum í bæjarstjórn.

Mest lesið


Fleiri fréttir

Sjá meira


×

Mest lesið