Mótmæltu lækkun á niðurgreiðslu í dagforeldrakerfi

Óánægðir foreldrar afhentu í morgun bæjarstjóranum á Akureyri undirskriftalista með rúmlega eitt þúsundum nöfnum bæjarbúa.

Mótmælin eru vegna þeirrar fyrirhuguðu ákvörðunar bæjarstjórnar að lækka niðurgreiðslur til foreldra sem vista börn sín hjá dagmæðrum en kostnaðarauki foreldra á mánuði getur orðið tólf þúsund krónur við hvert barn vegna fyrirhugaðra breytinga.

Sigrún Björk Jakobsdóttir bæjarstjóri sagðist skilja óánægju foreldranna en benti á að hvergi væri ódýrara að vista barn en á Akureyri. Hún útilokaði þó ekki að bærinn myndi hætta við fyrirhugaða breytingu um næstu áramót en hafnar því að greiðslurnar verði tekjutengdar.

Kerrur dagmæðra vöktu nokkra athygli þegar mótmælt var við Ráðhúsið á Akureyri í morgun enda minntu sumar þeirra helst á ungbarnarútur.