Ástandið á Njarðargötu allt að því viðunandi

Þrjátíu og tveir ökumenn eiga von á sektum eftir að hraðakstur þeirra var myndaður á Njarðargötu til móts við höfuðstöðvar Íslenskrar erfðagreiningar í gær.

Á einni klukkustund síðdegis fóru 265 ökutæki þennan veg í suðurátt og því óku 12 prósent ökumanna of hratt eða yfir afskiptahraða. Meðalhraði hinna brotlegu var liðlega 61 kílómetri á klukkustund en þarna er 50 kílómetra hámarkshraði.

Lögreglan bendir að meðalhraði þeirra sem ekið hafi of hratt hafi verið lægri en almennt gerist við vöktun sem þessa. Þeir voru sömuleiðis hlutfallslega færri en oft áður við sambærilegar hraðamælingar. Í ljósi þessa telur lögregla ástandið á Njarðargötu allt að því viðunandi.