Launadeilur á RÚV hafa engin áhrif á Edduna

„Hugsanlegar aðgerðir tæknimanna hjá RÚV myndi ekki hafa áhrif á útsendingu Edduverðlaunanna," segir Páll Guðmundsson trúnaðarmaður þeirra. Edduverðlaunin eru send út á yfirvinnutíma, en Fréttablaðið kvaðst í dag hafa heimildir fyrir því að tæknimenn á RÚV íhugi að hætta að vinna yfirvinnu hjá stofuninni. „Það er löngu búið að skipuleggja Edduna og menn standa við það sem sagt er," segir Páll.

Páll segir að tæknimenn hafi fundað vegna kjaramála í dag en vill ekkert láta hafa eftir sér um niðurstöður fundarins. Fréttablaðið hefur eftir Guðmundi Gunnarssyni, formanni Rafiðnaðarsambandsins, að meðalgrunnlaun tæknimanna hjá RÚV séu 212 þúsund krónur, eða um það bil hundrað þúsund krónum lægri en tíðkast á almennum vinnumarkaði.