Borgarráð vill samstarf við samkeppnisyfirvöld um lóðaúthlutanir

Leitað verður eftir samvinnu við Samkeppniseftirlitið og önnur yfirvöld samkeppnismála um hvernig standa skal vörð um samkeppnissjónarmið við skipulag og úthlutanir lóða, samkvæmt tillögu borgarstjóra, sem samþykkt var í borgarráði í dag.

Í greinagerð með tillögunni kemur fram að tilefnið sé að á undanförnum árum hafi í vaxandi mæli verið litið til samkeppnissjónarmiða við lóðaúthlutanir, s.s. fyrir bensínstöðvar, byggingavöru- og matvöruverslanir. Sömu sjónarmið komi í auknum mæli til skoðunar þegar matvöruverðslun og önnur þjónustustarfsemi sé annars vegar.

„Um leið er ljóst að eigendaskipti, að ekki sé talað um samruni fyrirtækja, geta kippt fótum undan þeim grundvelli sem slíkar úthlutanir hvíla á. Brýn þörf er á því að kortleggja hvaða eiðir Reykjavíkurborg hefur til að fylgja samkeppnissjónarmiðum eftir við skipulag og lóðaúthlutanir," segir í greinagerðinni.