Samgöngumiðstöð tilbúin eftir 18 mánuði

Tillögur að útliti samgöngumiðstöðvar liggja nú fyrir en miðað er við að hún þjóni ekki aðeins flugstarfsemi heldur einnig rútubílum, bílaleigum og strætisvögnum, og leysi þannig af gömlu Umferðarmiðstöðina. Reyndar er búist við að minnihluti notenda hennar verði farþegar innanlandsflugs enda er samgöngumiðstöð ekki síst ætlað að þjóna rútum í tengslum við millilandaflug frá Keflavíkurflugvelli. Þá er tekið fram í samkomulagi sem þáverandi samgönguráðherra og borgarstjóri gerðu í ársbyrjun 2005 að bygging hennar væri óháð ákvörðun um framtíð flugvallarins. Henni hefur verið valinn staður norðan við Loftleiðahótelið og er gert ráð fyrir að stærsti hluti bílastæða verði neðanjarðar undir byggingunni. Verkefnisstjórn undir formennsku Ólafs Sveinssonar hagverkfræðings hefur sett sér það markmið að samgöngumiðstöðin verði tilbúin þann 30. apríl 2009 og vonast til að framkvæmdir hefjist næsta vor. Að sögn Ólafs er þess nú beðið að samgönguráðherra gefi grænt ljós á að hefja hönnun og undirbúning útboðs.