Dómi vegna blygðunarbrots vísað heim í hérað

Hæstiréttur hefur ómerkt og sent heim í hérað dóm yfir karlmanni sem dæmdur var í sex mánaða skilorðsbundið fangelsi fyrir húsbrot, brot gegn blygðunarsemi og barnaverndarlögum. Manninum var gefið að sök að hafa ruðst inn á heimili konu og tveggja stúlkna, káfað á annarri stúlkunni utanklæða og reynt að kyssa hana og sýnt hinni stúlkunni ruddalegt og ósiðlegt athæfi.

Aðalmeðferð í málinu í héraðsdómi fór fram snemma árs 2006 og gáfu ákærði og vitni þá skýrslur fyrir dómi. Dómur hafði ekki verið kveðinn upp í því þegar héraðsdómarinn hvarf frá vegna veikinda. Sá dómari sem tók við málinu ákvað að skýrslugjöf og málflutningur skyldi fara fram að nýju og var það gert snemma á þessu ári. Þangað mætti ákærði ekki og var bókað eftir verjanda hans að honum væri kunnugt um þinghaldið en hann hefði kosið að mæta ekki til þess. Málið var svo dómtekið og var maðurinn sakfelldur fyrir þau brot sem honum voru gefin að sök.

Meirihluti Hæstaréttar komst hins vegar að því að þar sem ákærði hefði aldrei komið fyrir þann dómara sem dæmdi í málinu yrði ekki hjá því komist að ómerkja héraðsdóminn og leggja fyrir héraðsdómara að taka málið til löglegrar meðferðar og dómsálagningar að nýju.

Einn dómari, Hjördís Hákonardóttir, skilaði séráliti og taldi að meðferð málsins hefði verið haldin slíkum annmörkum að rétt væri að ómerkja dóminn og vísa málinu heim í hérað. Taldi hún rétt að munnlegur málflutningur færi fram fyrir Hæstarétti og málið yrði síðan tekið til efnislegrar úrlausnar.