Milljóna tjón af völdum hraðahindrana

Hraðahindrandir á götum höfuðborgarinnar valda skemmdum á strætisvögnum upp á margar milljónir króna á ári hverju. Verst er ástandið á leið 28 í Kópavogi en þar hafa þrír gírkassar eyðilagst það sem af er þessu ári. Hver viðgerð kostar um eina milljón. Strætó bs. og borgaryfirvöld funda um málið á næstunni.

„Þessir vagnar eru ekki byggðir til þess að keyra yfir ójafnt landslag," sagði Reynir Jónsson, framkvæmdastjóri Strætó bs., í samtali við Vísi. „Það gerist nokkrum sinnum á ári að vagnar skemmast illa vegna hraðahindrana og árlegt tjón hleypur á milljónum."

Reynir segir vandamálið ekki að strætisvögnum sé ekið of hratt yfir hindranirnar. „Vagnarnir eru lágir til þess að fólk eigi auðvelt með að stíga inn. Þetta þýðir ennfremur að vagnarnir rekast gjarnan niður í götuna þegar þeir keyra yfir hraðahindranir. Á þessu ári hafa þrír gírkassar eyðilagst á leið 28 í Kópavogi en þar þarf vagnstjóri að keyra yfir 58 hraðahindranir á hverjum klukkutíma. Það jafngildir að vagninn fari yfir 10 þúsund hraðahindranir í hverjum mánuði. Hver viðgerð á gírkassa kostar okkur um eina milljón króna."

Reynir segist hafa fullan skilning á því að leita þurfi leiða til að draga úr umferðarhraða í íbúðahverfum. Hins vegar séu hraðahindranir ekki eina lausnin. „Þrengingar á götum hafa gefið góða raun og þá má einnig koma upp hraðamyndavélum."

Guðbjartur Sigfússon, skrifstofustjóri framkvæmdasviðs Reykjavíkurborgar, segir borgaryfirvöld vita af vandamálinu. Í sumar hafi nokkrar hraðahindranir við Rofabæ verið fjarlægðar að ósk Strætó bs. Reynslan hafi hins vegar sýnt að hraðahindranir dugi best til að draga úr umferðarhraða. „Við höfum reynt að forðast að setja hraðahindranir á strætisvagnaleiðir. Hins vegar fáum við margar beiðnir á hverju ári frá foreldrum og íbúasamtökum um að koma upp hraðahindrunum í hverfum."

Borgaryfirvöld og Strætó bs. funda um málið á næstu dögum. „Við munum reyna að finna lausn á þessu," sagði Guðbjartur.