Lagt til að kaup á vændi verði gert refsivert

Lagt er til að Íslendingar innleiði hina svokölluðu sænsku leið og geri kaup á vændi refisvert samkvæmt frumvarpi sem lagt hefur verið fram á Alþingi. Alls standa níu þingmenn úr þremur flokkum á bak frumvarpið.

Flutningsmaður frumvarpsins er Kolbrún Halldórsdóttir, þingmaður Vinstri grænna. Samkvæmt frumvarpinu skal hver sem lætur af hendi eða heitir greiðslu eða öðrum ávinningi fyrir vændi sæta sektum eða fangelsi í allt að eitt ár.

Í greinargerð með frumvarpinu er vitnað í Gallup könnun þar sem 70 prósent aðspurðra voru hlynntir eða mjög hlynntir því að kaup á vændi yrði gert refsivert. Samkvæmt núgildandi lögum er ólöglegt að hafa milligöngu um vændi á Íslandi. Hins vegar er ekki refsivert að kaupa vændi eða selja.