Bruninn á Grettisgötu: Grunur um fíkniefnaviðskipti

Samkvæmt heimildum Vísis hefur lengi verið grunur um að stunduð hafi verið fíkniefnaviðskipti í húsinu sem kviknaði í á Grettisgötu í nótt.

Nágrannar hafa orðið varir við mikla umferð til og frá húsinu og þá sérstaklega um helgar. Þá koma bílar og gestir hússins stoppa stutt við. Að sögn þeirra nágranna sem Vísir hefur talað við í dag hefur þó engin verið í húsinu síðan um helgina.

Samvkæmt heimildum Vísis hefur lögreglan margoft þurft að hafa afskipti af húsinu og nágrannar eru hættir að kippa sér upp við það þegar hún mætir á staðinn.

Stefán Eiríksson lögreglustjóri á höfuðborgarsvæðinu segir lögregluna hafa fylgst lengi með ákveðnu húsi í miðbænum en vildi hinsvegar ekki staðfesta við Vísi að um þetta ákveðna hús væri að ræða. „Þú hefur upplýsingar nágranna og verður bara að treysta á þær."

Ekki er vitað hvort um íkveikju sé að ræða en í hádegisfréttum Stöðvar 2 í dag kom fram að rannsaka ætti tengsl fólks sem verið hefur í húsinu og brunans.