Franskar herþotur á Íslandi á næsta ári

Franskar flugsveitir verða staðsettar á Íslandi í fimm til sex vikur næsta vor. Þetta kom fram í máli Ingibjargar Sólrúnar Gísladóttur utanríkisráðherra á Alþingi í morgun.

Utanríkisráðherra gaf Alþingi munnlega skýrslu um utanríkismál í morgun. Þar kom meðal annars fram að fjölmargar NATO-þjóðir hefðu lýst yfir áhuga að vera með flugsveitir staðsettar hér á landi tímabundið.

Aðildarríkjum NATO gafst í morgun kostur á að sækja um að vera með flugsveitir hér á landi í tengslum við samstarf NATO-ríkja. Fram kom í máli Ingibjargar að Frakkar stefni að því að vera með flugsveitir hér á landi í 5 til 6 vikur næsta vor. Þá hafi Bandaríkjamenn lýst yfir áhuga að koma með flugsveitir hingað árið 2009 og einnig Norðmenn, Danir og Spánverjar. Enn fremur munu Pólverjar senda flugsveit til Íslands árið 2010.

Steingrímur J. Sigfússon, formaður Vinstri grænna, sagði hins vegar að það væri ekki gleðiefni helstu herveldi NATO vildu koma hingað til lands og leika sér í lofthelginni.