Kárahnjúkavirkjun öflugri en áætlað var

Aflvélarnar sex eru þær öflugustu sem settar hafa verið upp hérlendis en gert var ráð fyrir að hver og ein þeirra framleiddi 115 megavött. Í prófunum að undanförnu hafa þær verið keyrðar á allt að 130 megavöttum.

Til að átta sig á þessari miklu viðbótarorku er fróðlegt að taka Elliðaárvirkjun, sem er þrjú megavött, til samanburðar, en fimmtán megavatta viðbót úr hverri vél í Fljótsdal er fimmfalt meira afl en fæst úr Elliðaánum. Vélarnar í Fljótsdal eru hins vegar sex og samtals gætu þær fræðilega skilað 90 megavöttum aukalega, þrjátíu falt meira en Elliðaárstöðin. 90 megavött er álíka mikið og allar Sogsvirkjanir samtals. Landsvirkjunarmenn taka hins vegar fram að það muni aldrei koma til hægt verði að keyra allar vélar Fljótsdalsstöðvar á þessu mikla afli samtímis og gera ekki mikið úr fjárhagslegri búbót.