Forsætis- og umhverfisráðherra ósammála

Forsætisráðherra og umhverfisráðherra eru á öndverðum meiði varðandi hvort Íslendingar eigi að sækjast eftir sérákvæði í samningum um endurnýjun Kyoto samkomlagsins. Bæði eru þó sammála um að mikilvægast sé að fá stærstu mengunarþjóðirnar inn í samninginn.

Valgerður Sverrisdóttir þingmaður Framsóknarflokksins og fyrrverandi utanríkis- og iðnaðarráðherra, spurði forsætisráðherra á Alþingi í dag, hvort ríkisstjórnin stefndi að því að reyna að ná samningi um nýtt íslenskt ákvæði í þeim viðræðum sem framundan eru um framhald Kyoto samningsins. En samkvæmt núgildandi samkomulagi fá smærri hagkerfi, eins og Ísland, rýmri heimildir til losunar gróðurhúsalofttegunda en samkomulagið gerir almennt ráð fyrir.

Geir H. Haarde forsætisráðherra sagði það sína skoðun að Íslendingar ættu að sækja að nýju um "íslenskt ákvæði". En mest um vert væri að fá stóru mengunarþjóðirnar, Bandaríkin, Brasilíu og fleiri að samningaborðinu.

Valgerður fagnaði þessu svari forsætisráðherra, enda fæli þetta ákvæði í sér viðurkenningu á framlagi Íslands til málsins á heimsvísu þar sem Íslendingar notuðu endurnýjanlega orku. Kristinn H Gunnarsson Frjálslynda flokki tók í svipaðan streng.

Valgerður benti hins vegar á að ósamræmis gætti í yfirlýsingum forsætisráðherra og Þórunnar Sveinbjarnardóttur umhverfisráðherra, sem ekki vildi sækja um sérákvæði fyrir Ísland.

Guðfríður Lilja Grétarsdóttir þingmaður Vinstri grænna sagðist algerlega gáttuð á yfirlýsingu forsætisráðherra og það yrði Íslendingum til skammar að sækja á ný um sérákvæði.

Umhverfisráðherra segir að forsætisráðherra hefði lýst persónulegri skoðun sinni en jafnframt tekið fram að samningsmarkmið Íslendinga hefðu ekki verið ákveðin. Innan ríkisstjórnarinnar væru allir sammála um að ná þeim markmiðum að draga úr útblæstri um 50 - 75 prósent fyrir miðja öldina. Hún væri enn þeirrar skoðunar að ekki ætti að sækja um sérákvæði fyrir Ísland. Stefna ríkisstjórnarinnar fæli ekki í sér að hún hefði dregið í land með þá skoðun sína.