Efast um að sameining spítala og hjúkrunarheimilis hafi verið rétt

Ríkisendurskoðun segir að ekki hafi verið staðið nógu vel að sameiningu St. Jósefsspítala og Sólvangs í fyrra og draga megi í efa að sameiningin hafi átt rétt á sér.Þetta kemur fram í stjórnsýsluúttekt Ríkisendurskoðunar á starfsemi stofnunarinnar.

 Þar segir enn fremur að miklvægt sé að heilbrigðis- og tryggingaráðuneytið geri árangursstjórnunarsamning við spítalann þar sem fram komi hvaða verkefnum hann eigi að sinna. Þá þurfi að endurskoða samninga við sérfræðilækna og herða eftirlit með því að þeir fari ekki fram úr þeim einingafjölda sem kveðið er á um í samningum við stofnunina.

Í úttekt Ríkisendurskoðunar er enn fremur bent á að spítalinn hafi unnið að þróun lækningaaðferða og náð góðum árangri á ýmsum sviðum þjónustu. Einnig séu samskipti og starfsandi almennt góð hjá stofnuninni.

Hins vegar hafi verið ýmsar brotalamir við undirbúning og framkvæmd sameiningar St. Jósefsspítala og Sólvangs. Ekki hafi til að mynda verið sett fjárhagsleg og fagleg markmið um það hverju sameiningin ætti að skila. Ríkisendurskoðun telur að sameiningin hafi liðið fyrir þetta. Þá dregur Ríkisendurskoðun einnig í efa að þau rök sem notuð voru þegar sameiningin var ákveðin hafi átt við, þ.e. að rétt væri að koma á einni öflugri heilbrigðisstofnun fyrir sveitarfélagið, eins og víða hafði verið gert á landsbyggðinni. St. Jósefsspítali sé fyrst og fremst sérhæft sjúkrahús sem tekur á móti sjúklingum alls staðar að af landinu en sinnir síður almennri svæðisbundinni sjúkrahúsþjónustu. Sólvangur sé hins vegar hjúkrunarheimili fyrir aldraða.

Hafa ekki unnið bug á rekstrarörðugleikum

Þá er bent á að bæði St. Jósefsspítali og Sólvangur áttu í umtalsverðum rekstrarörðugleikum fyrir sameiningu og hefur enn ekki verið sigrast á þeim. Ein af ástæðum þess sé að læknar á St. Jósefsspítala vinni talsvert umfram heimilaðar ferliverka- og læknisverkaeiningar. „Gera verður þá kröfu til stjórnenda spítalans að þeir stýri betur starfi sérfræðilækna," segir í úttekt Ríkisendurskoðunar. Þá segir Ríkisendurskoðun að gera heilbrigðisráðuneytið verði að gera árangursstjórnunarsamning við stofnunina þar sem fram komi hvaða verkefnum spítalinn eigi að sinna og hvernig meta eigi árangurinn.