Ósvífin og siðlaus ákvörðun hjá bönkunum

Jóhanna Sigurðardóttir, félagsmálaráðherra, vill láta kanna hvort bankar hafi lagalega heimild til að meina íbúðakaupendum að yfirtaka húsnæðislán. Segir hún að ákvörðun bankanna sé bæði ósvífin og siðlaus og bitni verst á þeim sem eru að kaupa sína fyrstu íbúð. Mun hún ræða málið við viðskiptaráðherra.

„Þetta gerir mér mjög erfitt fyrir að bæta stöðu þeirra sem eru að kaupa sína fyrstu íbúð," sagði Jóhanna Sigurðardóttir, félagsmálaráðherra, í samtali við Vísi. „Að mínu mati styðst þessi ákvörðun bankanna við mjög hæpnar lagalegar forsendur og hún er bæði ósvífin og siðlaus."

Kaupþing tilkynnti í gær að frá og með næstu mánaðamótum verði lokað fyrir þann möguleika að íbúðakaupendur geti yfirtekið húsnæðislán bankanna. Verða kaupendur þá að taka ný lán á mun hærri vöxtum. Fram kom í hádegisfréttum Stöðvar 2 að sparisjóðir og Frjálsi fjárfestingarbankinn séu nú þegar farnir að krefjast hæstu vaxta ef íbúðalán með 4,15 prósenta vöxtum skipta um hendur vegna íbúðakaupa. Þá er gert ráð fyrir því að aðrir bankar fylgi í kjölfarið og loki einnig á þann möguleika að íbúðakaupendur geti yfirtekið húsnæðislán.

Jóhanna segist ætla að ræða málið við viðskiptaráðherra og láta kanna hvort bankar hafi lagalega heimild til að meina íbúðakaupendum að yfirtaka húsnæðislán. „Hérna eru bankarnir að sýna sitt rétta andlit og hvernig þeir hefðu hagað sér ef þeim hefði tekist að bola Íbúðalánasjóði út af markaðinum."