Vonast til að lækka flutningskostnað á Vestfjörðum um 20 prósent

Vonast er til þess að samgöngubætur á Vestfjörðum muni lækka flutningskostnað um 20 prósent á hvert tonn. Þetta kom fram í máli Kristjáns L. Möller, samgönguráðherra, í fyrirspurnartíma á Alþingi í dag.

Jón Bjarnason, þingmaður Vinstri grænna, spurði ráðherra eftir því hvernig hann hyggst beita sér fyrir úrlausnum á jöfnun flutningskostnaðar á landsbyggðinni. Benti hann á að flutningskostnaður á hvert tonn frá Reykjavík til Ísafjarðar væri nú um 35 þúsund krónur. Frá Reykjavík til Selfossar væri hann 8 þúsund krónur.

Kristján L. Möller, samgönguráðherra, vísaði til þess að í fjárlögum fyrir næsta ár væri búið að úthluta tímabundið um 150 milljónum til að jafna flutningskostnað á landsbyggðinni eða þangað til búið verður að ljúka við nauðsynlegar samgöngubætur. Vonast ráðherra til þess að með betri samgöngum megi lækka flutningskostnað. Þannig megi lækka flutningskostnað til Ísafjarðar úr 35 þúsundum á hvert tonn niður í 28 þúsund krónur. Þá taldi ráðherra að besta leiðin til að draga úr flutningskostnaði væri að bæta vegi og stytta vegalengdir.