Dæmdur hafnarstjóri heldur starfinu

Hafnarstjórinn á Raufarhöfn var í Héraðsdómi Norðurlands eystri í dag dæmdur til að greiða 150 þúsund krónur í ríkissjóð fyrir tollalagabrot. Hafnarstjórinn keypti 32 lítra af vodka af skipverjum togara sem lá í Raufarhafnarhöfn og kom fyrir í áhaldahúsi bæjarins.

Hafnarstjórinn var ekki sakfelldur fyrir brot í opinberu starfi eins og ákæruvaldið fór fram á þar sem brotið átti sér stað þegar Hafnarstjórinn var ekki í vinnunni.

Athygli vekur að þetta er í annað skiptið sem hafnarstjórinn á Raufarhöfn gerist sekur um tollalagabrot.

Málið komst upp þegar lögreglumenn sem lágu í leyni komu auga á Hafnarstjórann og félaga hans aka upp að skipshlið togara sem lá í höfninni og taka þar við tveimur svörtum plastpokum af skipsverjum.

Í samtali við Vísi sagðist Bergur Elías Ágústsson, sveitarstjóri Norðurþings, líta málið alvarlegum augum. Hafnarstjórinn hefði verið áminntur og það áréttað að þessi háttsemi væri með öllu óásættanleg.

"En þetta er góður starfsmaður. Honum urðu á mistök sem hann fullvissaði okkur um að endurtækju sig ekki," bætti Bergur við. Hann segir að Hafnarstjóranum verði ekki sagt upp vegna málsins.